قصة و قصيدة
قصة و قصيدة
عيد الأضحى 1435 اللي فات مسافرين لتبوك عشان ملكة أخوي رائد , خلصنا الملكة و رجعنا
و حنا راجعين ب 4 سيارات و وقفونا امن الطرق و عطونا مخالفات كل ال 4 سيارات هههههههه
ف كتبت هالقصيدة ممازحه لا أخوي رائد :
لعيون رايد نقطع الطرق ونروح
ونمشي بسرعه ونتسابق مع الريح
وبامن الطرق جندي رديٍ ومشفوح
والعسكر اللي بلغوا له مشافيح
قلت الخبر وشو ... احسب انه مزوح
قالوا قسيمه صدق ماهنا ممازيح
ياونتي ونة صويب ومجروح
يبكي على حاله من الغبنه يصيح
قالوا ترى مانته لحالك بمطروح
ربعك الاربع كل ابوهم مطاريح
ياخوي يارايد ترى منت مسموح
انت السبب يوم ان زدت التجاريح
تكفى ي ابو سويلم ي قطعه من الروح
سدد قسايمنا ونعطيك تصريح
و مالبثت إلا أن وصلني الرد من أخوي رائد يقول فيه :
بديت باللي يطلبونه عبيده
الواحد اللي كل ماقلت يوحيك
اللي أمرنا باتباع العقيده
عقيدة الاسلام والرب يهديك
ومن بعدها ابشر وش اللي تريده
هاك الصرافه واسحب اللي يكفيك
المال واجد والصرافه جديده
وان ماصرفت تعال واكتب لك الشيك
اطلب واللي ينقص ترانا نزيده
ي ابو خالد ما ازعلك والله لارضيك
طيبك ي ابو خالد نشر بالجريده
فعلك ينومس كل ماحل طاريك
وانته من اول لك جمايل عديده
بالطيب والمعروف محدٍ يماريك
و بالفعل ماقصر أخوي و سدد المخالفات و بيض الله وجهة
تعليقات
إرسال تعليق