قصيده مهداه الى عادل محمد الجعفري العنزي بمناسبه تمايم ابنه محمد
قصيده مهداه الى آخي عادل محمد الجعفري العنزي بمناسبه تمايم ابنه محمد :
أهلاً هلا يامرحبا ألف و ألفين
و عداد ماهلّت علينا السحابه
يامرحبا أهلين والفين سهلين
باللي حضر يامرحبا في جنابه
يامرحبا مليون ولّا ملايين
للي حضر في حفلنا ياهلا به
لنا الشرف بحضور ناسٍ عزيزين
من أصدقاء، من ربع، ولّا قرابه
مكانكم والله في داخل العين
ياعزوتي لا كشّر الوقت نابه
جانا محمد بعد ماطوّل سنين
والحمدلله والشكر يوم جابه
محمد ولد عادل حفيد السلاطين
و أبوه عادل عز من ينتخى به
و جدّه سميِّه من رجالٍ كريمين
راع الكرم، راع الفخر والمهابه
و جدّه أبو حمدان طلق الحجاجين
اللي بدرب الجود متعب ركابه
جعافره وافين وافين وافين
و الجعفري معروف طبع الوفا به
يكتب على درس المراجل عناوين
ويثبت على هقوات منهو هقى به
وحنا ليا جينا تغيب الشياطين
وحضورنا لا شك كلن درابه
واللي يعادينا من أول وهالحين
من غبنته يموت قبل صوابه
ويشهد على ماقول روس المعادين
كم راس شيخٍ نحذفه للذيابه
والحمد لله ماخلقنا ضعيفين
يا لابتي مثلك ولا فيه لابه
وفعل القبايل واضح و له براهين
في صفحة التاريخ تلقى الأجابه
وصلّوا على من بيّن الشرع والدين
اللّي على درب العداله مشى به
وأهلاً هلا يامرحبا الف وألفين
وعداد ماهلّت علينا السحابه
#شجاع_بن_سويلم
تعليقات
إرسال تعليق