طالبك ياعيني عليه تروفين

طالبك ياعيني عليّه تروفين
ماكل زين يمرنا تلحقينه

أنا رهين الزين لو هو بعد حين
وأصير عند الزين مثل الرهينه

مسجون في سجن الغلا والمحبين
ولا ودي اطلع ودي أبقى سجينه

من زينها ماكنّها خلقت بطين
استغفر الله كنّها من عجينه


كأنها تخيّرت تاخذ الزين
قط ما رأت عيني بحسنه وزينه

في وجهها قَبلَه ومبسم وخدّين
و اليا ابتسم تبين غمازتينه

كأن فمها ساكنن بين قوسين
قوسن على يسراه وقوسن يمينه

و رموش عينه ياماشاءالله جناحين
جنحان طير يطير فوق المدينه

و إذا أنتثر شعره على الخد اليمين
الخد الأيسر تشتعل به غبينه

واليا مشى يمشي على قلبي بلين 
واليا حكى يحكي هدوء وسكينه

خايف يصيبه شي أو يضرب بعين
عساه ياصل سالم لوالدينه


و لو كان في صدري من القلب قلبين
لأقسم القلبين بينه وبينه


شجاع بن سويلم