قصيدة مهداه إلى خالي حماد بن عقلاء
قصيدة مهداه إلى خالي حماد بن عقلاء بمناسبة شفائه
شجاع بن سويلم
أببتدي بسم الولي ذو الجلالي
الواحد المعبود جلّ جلاله
غني و مغني قادرٍ و متعالي
وهّاب معطي من صفاته عداله
و من بعدها باآقول مما بدالي
و ابي عربنا تقول شجاع قاله
و ينقال طيب من عمام و خوالي
و عمه و خاله محزمه راس ماله
و آباتحمد بالسلامه لخالي
الحمدلله و الشكر والثناء له
حماد ابن عقلاء خوي الجزالي
معروف فيه المرجله و الجزاله
يوم فحصوا قلبه لقوا طيب عالي
و قالوا له لازم ناخذك في عجاله
الطيب في دمّك وصل للمعالي
و من عيّنة دمك بناخذ جماله
بالطيب متحزّم من اول وتالي
و المجد و النوماس والفخر ناله
و الليل هذا غير عن الليالي
حتى القصيد اليوم منساح باله
دام انت خالي ايه ياطيب فالي
ومن كنت خاله انت ياطيب فاله
خالي يفك معقدات الحبالي
و الصعب ابو بندر على المتن شاله
بين الآوايل مافهق للتوالي
فيه البطوله و السطر و البساله
يقول لصعاب المواقف تعالي
كنه على الصعبات ماخذ و كاله
في ماقفه يرسي سواة الجبالي
و اذا عطى ما عدّ وشهو بقاله
ضاري على تقليط قرم الرجالي
بالمجلس اللي فيه طيب و رجاله
بالمجلس اللي فيه صفر الدلالي
ووجار ناره حماياتٍ دلاله
ثابت ولاعمره ولايوم مالي
ما قد تمايل كود ميلة عقاله
و اليوم انا مثله بميل عقالي
و اطيب من طيبه على كل حاله
و هاللزول ياعلّه ماهو للزوالي
مالي وحالي كل ابوهم فدا له
ووالله لاآوصي فيه حتى عيالي
لآني تراني واحدٍ من عياله
و دامك بخير وعافيه لاتبالي
عش و اتكل والله علينا اتكاله
و صلاة ربي عدّ وبل الخيالي
على الرسول اللي بعث بالرساله
شجاع بن سويلم
تعليقات
إرسال تعليق